Давосын чуулган түүхэндээ хоёр дахь удаагаа бууриа сэлгэн, Сингапурт болно

Жил бүр Швейцарын Давос хотноо болдог Дэлхийн Эдийн Засгийн Чуулганы ирэх жилийн арга хэмжээг тавдугаар сарын 13-16-нд Сингапурт зохион байгуулахаар болжээ. Тус арга хэмжээнд дэлхийн улс төр, бизнесийн салбарын удирдагчид чуулдаг онцлогтой.

Түүнчлэн зохион байгуулагчдын зүгээс  коронавирусний эрсдэлээс хамгаалах үүднээс ийнхүү ирэх жил буурь  сэлгэн Сингапурт болохоор болсон байна. Сингапур улс цар тахлын үед эрсдэлийн удирдлагыг зөв хэрэгжүүлж, хямралыг амжилттай удирдаж байна гэж үзжээ. Сингапур улсын Эрүүл мэндийн яамны сүүлийн мэдээллээр тус улсад коронавирусний халдвартай 28 хүн эмнэлэгт хэвтэн эмчлүүлж байна. Нийт 58,273 хүн халдвар авснаас 58,168 хүн эдгэрч, 29 хүн нас барсан гэсэн статистик байгаа юм. Сингапур улс цар тахлын тархалтаас сэргийлсэн хязгаарлалтын арга хэмжээг авсан хэвээрээ байна.

Тус улсын Худалдааны сайд Чан Чун Синг  “Сингапур улс дэлхийн удирдагчдыг уулзахад аюулгүй нөхцлөөр хангасан төвийг сахьсан байр суурьтай болохыг баталгаажуулан Дэлхийн Эдийн Засгийн Чуулганыг манай улсад зохион байгуулахаар шийдвэрлэлээ” гэжээ.

Тодотгоход, уг арга хэмжээ түүхэнд хоёр дахь удаагаа  Давос хотоос өөр газар зохион байгуулагдах гэж байна. 2002 онд есдүгээр сарын 11-ний террорист халдлагын дараа дэлхийн улс орнууд АНУ-тай эв санааны нэгдлийг илэрхийлэх зорилгоор Нью-Йоркт зохион байгуулж байв.

Дэлхийн Эдийн Засгийн Чуулга уулзалтыг 50-иад жилийн өмнө анх санаачилсан Клаус Шваб дэлхийн удирдагчдын энэ удаагийн дээд хэмжээний уулзалт цар тахлын дараах дэлхийн эдийн засгийн сэргэлтийг шийдвэрлэхэд чухал нөлөөтэй. 2020 онд алдсан асуудлуудаа залруулахын тулд төр, хувийн хэвшлийн хамтын ажиллагаа урьд өмнөхөөс илүү хэрэгтэй байна хэмээн байр сууриа илэрхийлжээ.