САЙН МЭДЭЭ: Халдвар авсан 89 хүн эдгэрч, ХӨСҮТ-өөс гарлаа

Сүүлийн 24 цагийн нэгтгэсэн мэдээллээр Монголд бүртгэгдсэн халдварын тоо 941 болж, дотоодод бүртгэгдсэн халдварын тоо 488 хүрсэн ч өчигдөр 89 хүн эдгэрч, дараагийн хяналтын шатанд шилжжээ. 

ХӨСҮТ-д одоо 452 хүн эмчлүүлж байгаа бөгөөд тэдгээрийн 416 нь хөнгөн, 32 нь хүндэвтэр, 3 нь хүнд, 1 хүн маш хүнд байдалтай байна. Эдгэсэн хүмүүсийг Яармагийн 300 ортой эмнэлэгт тусгаарлалтад гаргажээ. 

Арванхоёрдугаар сарын 17-нд буюу өчигдөр Улаанбаатар хот болон орон нутаг дахь лабораториудад 9070 хүнд шинжилгээ хийхэд 18 хүнд коронавирус илэрсэн. Эдгээр нь Улаанбаатар хотод хамаарч байгаа бөгөөд шинээр бүртгэгдсэн 18 тохиолдол бүгд өчигдөр хоёр халдвар бүртгэгдсэн Баянзүрх дүүргийн нэгдсэн эмнэлгээс илэрсэн юм. Ингэснээр тус Баянзүрх дүүргийн эмнэлэгт үүссэн голомтоос коронавирусний халдвар авсан хүний тоо 20 болж нэмэгдлээ. 

ЭМЯ-ны Хэвлэлийн хурлын үеэр ХӨСҮТ-ийн Тандалт судалгааны албаны дарга А.Амбасэлмаа шинээр бүртгэгдсэн халдварын талаар "Өнөөдрийн халдвар илэрсэн 18 хүн бүгд эмнэлэг дотор халдвар авсан. Гадагш вирус тараагаагүй. 12 өвчтөн, 3 сувилагч, 3 сахиурын хүн байгаа. Баянзүрх дүүргийн эмнэлэгт батлагдсан эхний тохиолдлууд халдвар гарч байсан голомт бүхий газарт амьдардаг бөгөөд тухайн бүс нутгаас эхтэй халдварын голомт үүссэн байх магадлал өндөр байна. Тодруулбал, Баянзүрх дүүргийн эмнэлгийн голомтын эхний тохиолдол төмөр замын голомтоос улбаатай байх магадлалтай. Бид нарийн хаяг, хүмүүсийн нэрийг зарлахгүй. Бүх хавьтлыг тогтоож байгаа. Халдварын батлагдсан 20 тохиолдлуудын хавьтал болох 645 хүнийг олж тогтоосон. 266 хүнийг тусгаарлан ажиглах байранд тусгаарласан. 369 хүнийг гэрийн ажиглалтад байлгаж байна. Эхний 469 хүнд хийсэн хавьтлын шинжилгээгээр халдвар илрээгүй. Баянзүрх дүүргийн нэгдсэн эмнэлэгт эмч, ажилчид, өвчтөнүүд, сахиур гээд нийт 379 хүний тусгаарлан, ажиглаж байна.  Баянзүрх дүүргийн эмнэлэгт хэвтэж байсан халдвартай хүн энэ сарын 15-нд эмнэлгээс гарсан гэж мэдээлсэн. Бид түүнийг тэр дор нь гэрээс нь эмнэлэгт авчирч, гэр бүлийн хүмүүсийг нь тусгаарласан" гэх мэдээллийг өгсөн юм.

Түүнчлэн ХӨСҮТ-ийн ачаалал болон тус эмнэлгийн эмч, ажилчид халдвар авснаар нөхцөл байдал хүндэрсэн эсэх тухайд "ХӨСҮТ ачааллаа даахгүй, хэцүү болсон зүйл байхгүй. Хэвийн ажиллаж байгаа. Халдвар авсан эмнэлгийн ажилтнууд эдгэрсэн. ХӨСҮТ дэх голомт устсан гэж хэлж болно" гэсэн хариулт өгсөн юм.