КОВИД-19: Улаанбаатарт 21 хүнээс коронавирус нэмж илэрлээ

Эрүүл мэндийн яамнаас коронавирусний тархалт, шинжилгээ, нөхцөл байдлын талаар мэдээлэл хийлээ. (2021.01.03, 11:00 цагийн байдлаар)

Өнгөрсөн 24 цагийн хугацаанд нийт 5807 хүнд PCR шинжилгээ хийхэд 21 хүний шинжилгээнд коронавирус илэрчээ. Эдгээр нь бүгд Улаанбаатар хотод хамаарч байна.

ХӨСҮТ-ийн Тандалт, судалгааны албаны дарга А.Амбасэлмаа "Баянзүрх дүүргийн нэгдсэн эмнэлэг, Хавдар судлалын үндэсний төвийн эмнэлэгт батлагдсан тохиолдлын ойрын хавьтлаар тусгаарлагдан, ажиглан тусгаарлах байранд тусгаарлагдаж байсан 19 хүний 2-3 дахь давтан шинжилгээнээс халдвар илэрсэн. Мөн хоёр гэр бүлийн тандалтаас халдвар илэрсэн. Шинээр 21 тохиолдол нэмэгдсэнээр Улаанбаатар хотын шинээр бүртгэгдэж байгаа кластер халдварын голомтод батлагдсан тохиолдол 450 боллоо. Бусад аймагт халдвар бүртгэгдээгүй. 

Улсын хэмжээнд кластер өвчлөлийн голомт дахь халдвартай хүний тоо 776  болсон байна. Сүүлийн 24 цагт 14 хүн эдгэрч, эмнэлгээс гарсан. 

Монгол Улсын хэмжээнд бүртгэгдсэн халдварын тоо 1263 боллоо. Үүний 869 тохиолдол нь эдгэрсэн. Өнөөдрийн байдлаар эмнэлгүүдэд нийт 384 хүн эмчлүүлж байна" гэлээ. 

"Өмнө нь гарсан 4-5 том голомтыг хяналтын дараах 14 хоногийн ажиглалтад шилжүүлсэн. Харин БЗД-ийн хувьд том голомт гарсан учир хавьтлыг хянах хугацаа дуусаагүй. Бид 400-гаад хавьтлыг 14 хоногийн хяналтаас гаргаж, гэрийн ажиглалтад шилжүүлсэн. Одоогоор 900 гаруй ойрын хавьтлыг тусгаарлан, ажиглалт хяналтад аваад байна. Хоёрдагч хавьтал 2000 гаруй хүн байгаа. Баянзүрхийн дэгдэлттэй холбоотой гэр бүлийн дам хавьтлууд үүсэж байна. Мөн 1-2 хавьтлын эх уурхайг тогтоогдоогүй байгаа. Иргэдийн дунд шинж тэмдэггүй буюу хөнгөн балархай өвчилсөн хүмүүс байхыг үгүйсгэхгүй. Тиймээс хүн бүр хичээх хэрэгтэй" гэдгийг тэрбээр мөн онцоллоо.