Дүйчин өдөрт зориулсан Дүйнхорын хурал хурлаа

Гандантэгчэнлин хийдийн Дэчэнгалаба дацангийн лам хуврагууд Зуны тэргүүн сарын шинийн 15, Бурхан багшийн дүйчэн өдөр буюу гурван их үйл давхацсан энэхүү чухал өдөр Дүйнхорын их хурлыг ёслол төгөлдөр хурлаа.

Дүйнхор нь санскрит хэлээр Калачакра хэмээн нэрлэгддэг бөгөөд “Цогт цагийн хүрдэн” хэмээх утгатай. Энэ нь шүтэн барилдлагыг гүн гүнзгий тайлбарласан, бүх үзэгдэл юмсын уг чанарыг ухаарахад хүргэдэг, энэрэн нигүүлсэхүй, гэгээрэлд хүрэх замыг заасан гүн ухааны онцгой тарнийн ёсны хурал юм. Дүйнхорын хурал нь зөвхөн хувь хүн төдийгүй улс орон даяар амгалан тайван, энх тунх, цаг агаар тэгширсэн, өвчин тахал, дайсан хорлол үгүй болохын тусын тулд хурагддаг.

Дүйнхорын номын ерөөлөөр хүн төрөлхтөн сэтгэлийн амгалан оршихуйг олж, үйлийн үрийн гинжнээс ангижрахын зэрэгцээ энх тайвныг тогтоох, эд баялаг дэлгэрэх, өвчин зовлон арилан, байгал дэлхий аюулгүй оршихын утгыг агуулаад зогсохгүй, Монгол төр, түмэн олны заяа буян батжин бадрах болтугай!