Хүүхдийн зуслангуудын үйл ажиллагаа энэ сарын 15-наас зогсоно

Нийслэлийн ногоон бүсэд зөвшөөрөлтэй үйл ажиллагаа явуулдаг аж ахуйн нэгжийн болон хувь хүний 23 зуслан байдаг. Эдгээрээс нийслэлийн Хүүхдийн төлөө газарт хүсэлт тавьж, 18 зуслан өнгөрсөн зургадугаар сараас эхлэн эхний ээлжийн амрагчдыг бүртгэсэн билээ. Одоогоор 9800 гаруй хүүхэд зуслангуудад нэг долоо хоногт 90-100 мянган төгрөг төлж амраад байгаа ажээ. Нийслэлийн Засаг дарга Г.Мөнхбаярын санаачилгаар нэн ядуу өрхийн 500 хүүхдийг зусланд төлбөргүй амраасан байна. Энэ ажилд Засаг даргын нөөц хөрөнгөөс 12 сая төгрөгийг зарцуулжээ. Зуслангууд хуваарь ёсоор гуравдугаар ээлжийн амрагчдаа хүлээж авч амраагаад энэ сарын 15-нд үйл ажиллагаагаа дуусгахаар болжээ.

Эх сурвалж: Амралтын шуудан сонин