ӨГЛӨӨНИЙ МЭНД!
Өнөөдөр 2023.01.19. Билгийн тооллын 27. Монгол эх оронд маань нар 08 цаг 34 минутад мандлаа, 17 цаг 31 минутад жаргана.
Улаанбаатар хотод үүл багасна. Өдөртөө -23 хэм, шөнөдөө -30 хэм хүйтэн. Та хувцсаа тохируулж өмсөөрэй.
Энэ өдөр “Кварк” аарцны дэлхийн өдөр. АНУ-д өнөөдөр попкорны өдөр, Беларуст Аврагчдын өдөр, Энэтхэгт Кокборок хэлний өдөр, Исландад Эхнэр, нөхрийн өдөр.
Энэ өдөр Францын зохиолч, аялагч Жак Анри Бернарден, Америкийн алдарт зохиолч Эдгар Аллан По, Оросын гимнастикч, олимпын хоёр удаагийн аварга Светлана Хоркина, дуучин Алексей Воробьёв, Украин, Германы уран гулгагч, олимпын аварга Алёна Савченко, Америкийн холимог тулаанч Дастин Пуарье зэрэг алдартан мэндэлжээ.
Энэ өдөр дэлхий дахинд болсон онцлох үйл явдлууд:
1649 оны энэ өдөр Канадад анх удаа цаазын ялыг гүйцэтгэж, 16 настай охиныг хулгайн хэргээр цаазалж байжээ.
1728 оны энэ өдөр Оросын эзэн хаан II Пётр Москва хотод шилжин суурьшжээ.
1825 оны энэ өдөр хүнсний бүтээгдэхүүнийг хадгалах зориулалт бүхий төмөр савыг патентжуулжээ.
1853 оны энэ өдөр Ром хотноо Жүзеппе Вердигийн “Трубадур” дуурийн нээлт болов.
1903 оны энэ өдөр анхны “Тур де Франс” дугуйн уралдааныг зохион байгуулах тухай зарлажээ.
1915 оны энэ өдөр Жорж Клод неон гэрэл бүхий сурталчилгааны самбарын патентийг авав.
1938 оны энэ өдөр Америкийн “General Motors” компани дэлхийд анх удаагаа дизель хөдөлгүүрийг их хэмжээгээр үйлдвэрлэж эхэлжээ.
1966 оны энэ өдөр Индира Ганди Энэтхэгийн анхны бөгөөд цорын ганц эмэгтэй Ерөнхий сайд болжээ.
1995 оны энэ өдөр Оросын цэргүүд Чеченийн нийслэл Грозный дахь Ерөнхийлөгчийн ордныг эзэлсэн байна.
Өнөөдөр үс засуулвал Өлзийтэй сайн.
Эл өдөр тахиа, могой жилтнээ аливаа үйлийг хийхэд эерэг сайн бол үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба мал арилжих, буг дарах, газрын ам бооход сайн. Харин байшингийн суурь тавих, угаал үйлдэхэд муу. Өдрийн сайн цаг нь бар, туулай, могой, бич, нохой, гахай.
Хол газар явах бол баруун хойш мөрөө гаргаад аян замдаа гараарай.
Өнөөдрийн ажилд тань амжилт хүсье.
Холбоотой мэдээ
Сэтгэгдэл ( 0 )