Орос орноор аялж, танилцах виртуал платформыг нээжээ

Автор | Zindaa.mn
2023 оны 03 сарын 30

ОХУ-ын бизнес, худалдаа, үйлдвэрлэл эрхлэгчдийн “Ворота в Азию” (Азийн хаалга) үзэсгэлэн Оросын шинжлэх ухаан, соёлын төв (Улаанбаатар дахь Русский дом)-д нээгдлээ. Манай улсад 37 дахь удаагаа болж буй тус үзэсгэлэнд Оросын уламжлалт эмчилгээ, анагаах ухаан, аялал жуулчлал, барилга, эрчим хүч, мебель, мод, модон эдлэл, хүнсний 10 гаруй компанийн төлөөлөл оролцож бүтээгдэхүүнээ дэлгэжээ.

Үзэсгэлэнгийн хүрээнд мөн “Здравствуй, Россия” (“Сайн байна уу? Орос орон”) нэртэй VR платформ нээлтээ хийнэ. Тус виртуал платформ нь "Улаанбаатар Русский дом"-оор орж, тухлан саатах Монголын иргэд, зочдод Оросын байгаль, түүхэн дурсгалт газраар дэвшилтэт технологи ашиглан танилцах шинэ боломж олгож байна. Платформын төв байрлаж буй танхимын элементүүдийг Оросын уламжлалт хэв маягаар буюу ардын соёлыг шингээсэн модон эдлэлийн үндэсний загвараар тохижуулжээ.
 


“Здравствуй, Россия” VR-д зочилсон хүмүүс Оросын хотуудаар аялж, жуулчлалын шилдэг маршрут бүхий түүхэн дурсгалт газрууд, музейтэй танилцах юм.

Жишээ нь, Байгаль далайгаар аялах монгол иргэд тус нуурыг бүхэлд нь харж, хаана нь очиж тухлан, юу үзэж харахаа сонгох боломжтой аж.
 


Мөн ОХУ-ын Эрхүү хотын зураач, багш Владимир Бешновын дурсгалд зориулсан үзэсгэлэнг нээжээ.

Тэрээр Бүх Оросын зураачдын холбоо, ЮНЕСКО-ийн дэргэдэх Дүрслэх урлагийн Олон улсын холбоо, Оросын дизайнеруудын холбооны гишүүн, Монгол оронд хайртай, монголчуудын дотны анд байсныг СУИС-ийн хүндэт профессор, “Монголын салхи” төслийн үүсгэн байгуулагч Г.Лхагвасүрэн дурсан ярив.
 


Түүний амьдрал ахуйг байгаль хийгээд аялал жуулчлалгүйгээр төсөөлөхийн аргагүй. В.Н.Бешновын уран бүтээлийн дийлэнх хэсэг нь Монгол, түүний дахин давтагдашгүй байгальд зориулсан байдаг.

Тэрээр ганцаарчилсан болон муж, бүс нутаг, олон улсын хэмжээнд олон үзэсгэлэн гаргаж байсан. 
 


Улаанбаатар дахь "Русский дом"-д нээсэн үзэсгэлэнд мөн Эрхүүгийн зураач Валентина Державинагийн “Монгол Говь” хэмээх алдарт зургийг үзэх боломжтой.
 

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Mongol(103.212.116.188) 2023 оны 03 сарын 30

Haana neegdsen be russkii dom gej haana bdag ve\n

0  |  0
Top