Хөгжлийн бэрхшээлтэй хүүхдүүдэд нүүдлийн соёлыг ахуй дээр нь таниулна

“Алсын хараа 2050” Монгол Улсын урт хугацааны хөгжлийн бодлогын 1.2.2 дахь “Хүмүүнлэг, оюунлаг, ёс суртахуунтай, үндэсний соёлын мэдлэг, чадвар, дадалтай монгол хүнийг бэлтгэнэ” зорилт,  “Бүх нийтийн соёлын боловсрол” олгох ажлын хүрээнд хөгжлийн бэрхшээлтэй хүүхдүүдэд үндэсний үнэт зүйл, түүх, өв соёл, зан заншлыг сурталчлан таниулах, урлагаар дамжуулан нийгэмшүүлэн төлөвшүүлэх тусгай сургалт, хөтөлбөр өчигдөр /2022.07.28/ нээлтээ хийлээ.

Хөтөлбөрт оюуны хөгжлийн бэрхшээлтэй, даун, аутизм, сонсголын болон хэл ярианы бэрхшээлтэй Нийслэлийн 55, 29 дүгээр тусгай дунд сургуулийн 25 сурагч, тэдний эцэг эх, асран хамгаалагчид хамрагдах юм. Хөтөлбөрийг Соёлын яамны дэмжлэгтэйгээр Монголын Сургуулиас гадуурх сургалтын Санрайс холбоо, Монголын Үндэсний музей / National Museum of Mongolia, Хүүхдийн төв номын сан, Монголын Уран Зургийн Галерей The National Art Gallery Of Mongolia,  Монгол Улсын Хүүхэлдэйн Театр, Mongol nomadic Tourist Camp / Монгол номадик цогцолбор  хамтран хэрэгжүүлнэ.

Хөтөлбөрийн хүрээнд Монгол ахуйтай танилцах байгалийн сургалт, танин мэдэхүйн аялал, “Тусгай хэрэгцээ шаардлагатай хүүхдүүдийг урлагаар дамжуулан нийгэмшүүлэн хөгжүүлэх” модуль сургалт, “Хөгжлийн бэрхшээлтэй хүүхэд, иргэдийн эрх ашгийг хамгаалах төр, иргэний нийгмийн байгууллагууд, иргэдийн төлөөллийг оролцуулсан хэлэлцүүлэг” зохион байгуулах зэрэг олон ажлууд төлөвлөж байна.

Хүүхдүүд өчигдөр музейгээр аялж, номын сангаар үйлчлүүлж, уран зургийн галерейтай танилцан, соёл, урлагийн үйлчилгээг хүртсэндээ сэтгэл хангалуун байсан бөгөөд 3 сарын турш нүүдлийн соёлыг ахуй дээр нь таниулах болон соёл, урлагийн үйлчилгээ, сургалт хөтөлбөрт хамрагдах юм.