Монгол Улсад дөрөвдүгээр сарын 18-ны мэдээллээр 1340 хүнээс коронавирусний халдвар илэрсэн нь цар тахал эхэлснээс хойш манай улсад хоногт бүртгэгдсэн хамгийн өндөр тоо боллоо.

Энэ өдөр нийт 11963 хүнээс шинжилгээ авахад 1340 хүн ковидын халдвар авсан нь тогтоогджээ. Хоногт илэрсэн халдварын 1220 нь Улаанбаатарт, 119 нь орон нутагт бүртгэгдээд байна.

Дөрөвдүгээр сарын 18-ны байдлаар
 

• Монгол Улсад бүртгэгдсэн нийт халдварын тохиолдол - 21995
• Эдгэрсэн хүний тоо - 11877
• Нас баралт - 44
• Улаанбаатарт бүртгэгдсэн халдварын тоо - 18876
• Орон нутагт бүртгэгдсэн халдварын тоо - 2549 байна.

Байдал цаашид энэ хэвээрээ үргэлжилбэл ирэх зургаадугаар сард халдварын оргил үе ирнэ гэж мэргэжлийн хүмүүс хэлж байна. Нас баралт өдөрт 30-40, цаашлаад 100 давах аюул ойрхон байна.

Монгол Улс ковидын халдварын тохиолдлоор бүс нутагтаа тэргүүлж эхэлснийг дэлхий нийт мэдээлж эхэллээ. 

Жонс Хопкинсийн их сургуулиас гаргадаг тоон мэдээллээр манай улс нэг сая хүн амд ноогдох хоногт илэрсэн халдварын тоогоор бүс нутагтаа тэргүүлж байгаа бол дэлхийд 44 дүгээрт жагсаж байна.

Монгол Улсад халдварын өсөлтийн хурд бусад улстай харьцуулахад маш өндөр байгаа нь сэтгэл түгшээсэн үзүүлэлт болсоор байна. 

СЭТГЭЛ ТҮГШЭЭСЭН ҮЗҮҮЛЭЛТ
 

Оксфордын их сургуулийн гаргасан “Our World In Data” сайтад улс орнуудын коронавирусний халдварын өсөлт, нас баралт, нэг сая хүнд ноогдож байгаа халдварын тоог гаргадаг.

Тус сайтад энэ сарын 14-нд гаргасан өөрсдийнх нь аргачлалын тоон мэдээллээр Монгол Улсын нэг сая хүн ам тутамд 276.23 нь хоногт ковидоор өвчлөх эрсдэлд оржээ. Дэлгэрэнгүйг ЭНД дарж, харах боломжтой. 

Монгол Улсыг дэлхийд коронавирусний халдварын тоогоороо тэргүүлж байгаа эхний таван орон болох АНУ, Энэтхэг, Бразил, Франц, ОХУ-тай харьцуулахад хоногт бүртгэгдэж буй халдварын тоог нэг сая хүн амд ногдуулсан үзүүлэлтээр Энэтхэг, АНУ, ОХУ-ыг гүйцжээ. 

Гурван сая гаруй хүн амтай Монгол Улсын хувьд дээрх үзүүлэлтүүд сэтгэл түгшээх, аюулын харанга дэлдсэн мэдээ. 

Манай улсад тохиолдлын тоо нэмэгдэхийн хэрээр хүнд, маш хүнд хүмүүсийн тоо нэмэгдэж, нас баралт өсөж байгааг Эрүүл мэндийн яам өдөр бүр мэдэгддэг. Ковидоор өвчилсөн ямар ч суурь өвчингүй хүмүүс сэхээнд ороод хоёр хоногийн дотор бие нь муудах, уушги нь идээлэх тохиолдол олон гарч байгааг халдварын голомтод ажиллаж байгаа эмч нар хэлж байна.

Өнгөрсөн 24 цагийн хугацаанд ковидын халдварын улмаас гурван хүн нас барж, нийт нас баралт 44 боллоо. Нас барсан иргэд бүгд ковидын хүндрэлийн улмаас гэсэн оноштой байжээ. Тодруулбал, 44 настай, эрэгтэй дөрөвдүгээр сарын 16-нд онош нь батлагдаж, СБД-ийн Нэгдсэн эмнэлэгт хэвтэн эмчлүүлж байсан, ковидын хүнд нөхцөл гэсэн оноштойгоор нас барсан. 51 настай, эмэгтэй дөрөвдүгээр сарын 17-нд онош нь батлагдаж, Цэргийн төв эмнэлэгт эмчлүүлж байгаад Ковидын хүнд нөхцөл гэсэн оноштойгоор нас барсан. Гурав дахь тохиолдол нь дөрөвдүгээр сарын 15-нд онош батлагдаж, эмнэлэгт хэвтсэн иргэн биеийн байдал хүндэрсний улмаас өчигдөр нас баржээ.
 

УЛААНБААТАР ХОТОД ИЛЭРЧ БУЙ ТОХИОЛДЛУУД 150 ГАРУЙ ХОРООГ ХАМАРЧ БАЙНА
 

Эхлээд сүүлийн нэг сар буюу 2021 оны гуравдугаар сарын 18-наас дөрөвдүгээр сарын 18-ны хооронд нөхцөл байдал хэрхэн хүндэрснийг дараах тоогоор харуулъя. Нэг сарын хугацаанд нас баралт 40-өөр нэмэгдсэний 22 нь сүүлийн долоо хоногт бүртгэгджээ. 
 

Улаанбаатар хотод бүртгэгдэж байгаа халдварын тохиолдлууд 150 гаруй хороог хамарч байгааг ЭМЯ-наас өнөөдрийн ээлжит хурлаараа мэдээлсэн.

Нийслэл хот бүхэлдээ коронавирусний халдварын голомт болоод байна. Халдвар орон сууцны хорооллуудаас ихэвчлэн илэрч байгаа аж.

ЭМЯ-наас өдөр бүр 11:00 цагт хийдэг мэдээллээрээ иргэдийг шаардлагагүй бол гэрээсээ гарахгүй байхыг, хөл хорионы дэглэмээ баримтлахыг, коронавирусний халдварыг зүгээр нэг ханиад мэтээр хүлээж авахгүй байхыг сануулдаг. Гэвч нийслэл хотын гудамж талбай хөл хорио тогтоогоогүй юм шиг, хөл хөдөлгөөн ихтэй хэвээрээ байна. Хаа сайгүй салхилах, зугаалах хүмүүс, байрнуудын гадаа тоглох хүүхдүүд... Дэлгүүр ороход хүн хоорондын зайгаа огт бариагүй дэлгүүр дүүрэн хүмүүс...

Уг нь бол цар тахлын үед дэлхийн улс орнуудад удаан хугацаанд салхилах, дэлгүүрээр ойр ойрхон үйлчлүүлэх, дэлгүүрт удаан байх зэргийг хориглож, иргэд журмын дагуу салхилж, дэлгүүр, худалдааны төвөөр үйлчлүүлдэг. Япон улсад цар тахал хүнд үедээ хүрсэн 11, 12 дугаар саруудад ягштал дагаж мөрдсөн Гурван С-гийн дүрмийг бусад орнуудад ч баримталснаар үр дүнд хүрсэн. Гурван С-гийн дүрэмд Олон хүн бөөгнөрсөн газраар явахгүй байх, Бүгчим орчинд байхаас татгалзах, Хүн хоорондын зай барьж явах багтана.

Дэлгүүр, худалдааны төвөөр үйлчлүүлэхдээ аль болох хурдан худалдан авалтаа хийгээд гарах,
агааржуулалт муутай газраар орохгүй байх талаар олон улсад мөрдөж буй дүрэм
 

•  Дэлгүүрт 15 минутаас илүү байж болохгүй. Худалдаж авах зүйлсийнхээ жагсаалтыг урьдчилан гаргаж ороод 15 минутын дотор хүнс, бараагаа цуглуулах гарах
   
• Бээлий өмсөж, гар ариутгагч биедээ авч яв. Амны хаалт зүүх, хүн хоорондын зай барих нь цар тахлын үед бидний байнгын хэвшил болсон зүйл. Дэлгүүр орохдоо үүн дээр нэмээд бээлий өмс. Олон дэлгүүрт тэрэг, сагсны дэргэд гар ариутгагч байрлуулсан байгаа. Гэхдээ л та гэрээсээ гар ариутгагч аваад гарахад илүүдэхгүй. “COVID-19” вирус нь пластик гадаргуу дээр 2-3 өдөр хадгалагддаг нь судалгаагаар тогтоогдсон. Үүнээс гадна тэрэг, сагснаас гадна хаалганы бариул, өөртөө үйлчлэх дэлгэц зэрэг халдвар дамжуулах эрсдэлтэй зүйлүүд дэлгүүрт олон бий. Тэдгээрт бээлийтэй хүр, эсвэл хүрснийхээ дараа гараа ариутгагчаар арч. Хэрэглэсэн бээлийгээ шууд хая.
   
• Нүүрэндээ бүү хүр. Нүд, хамар, амандаа гараа хүргэхгүй байхыг дэлхий даяар зарласаар, анхааруулсаар байгаа.
   
• Гар утсандаа бүү хүр. Худалдаж авах зүйлсийнхээ жагсаалтыг гар утсан дээрээ хадгалдаг бол үүнийгээ зогсоо. Үүнийхээ оронд жагсаалтаа цаасан дээр бич. Гар утасны дэлгэц нь байнга хүрдэг зүйлсийн нэг учир дэлгүүрт байхдаа утсаа далд хийж, аль болох хүрэхгүй байгаарай.
   
• Хүлээцтэй бай. Шинэхэн ногооны хажуугаар түлхэлцэн шахцалдах хүмүүс таны тэвчээрийг барж, дуусахаас нь өмнө та ч гэсэн ногоо руу зүтгэчихмээр байсан ч тэвч. Хүмүүсээс 1.5 метрийн зайд бай. Одоо бүх дэлгүүрт таныг хаана зогсож хүлээхийг заасан тэмдэг байрлуулсан байгаа.
   
• Худалдан авч буй бүтээгдэхүүнийхээ сав, баглаа боодлынх нь бүрэн бүтэн байдал болон тухайн бүтээгдэхүүний бүтэн байдлыг шалгаж аваарай.
   
• Амталж болохгүй! Амталгаанд зориулан тавьсан зүйлс хорхойг тань хүргэж байсан ч хажуугаар нь өнгөрөөд яв. Одоо та амтлах цаг биш. Нийтэд зориулан тавьсан хоол унд руу хэчнээн хүний амьсгал орж, бүр найтаасан ч юм билүү хэн мэдлээ!
   
• Картаар төлбөрөө хий. Гараас гарт дамжсан мөнгийг та худалдагчид өгч, тэр танд мөн л гараас гарт дамжсан хариулт өгнө. Иймээс картаар тооцоо хий.

ВАКЦИН ХИЙЛГЭСЭН Ч АМНЫ ХААЛТАА ЗҮҮ!
 

ДЭМБ-аас коронавирусний халдвараас хамгаалах хамгийн энгийн бөгөөд хямд төсөр арга нь амны хаалт гэдгийг баталдаг. Амны хаалт нь халдвараас 98 хувь хамгаална. Амны хаалтыг дотоод болон гадаад орчинд хоёуланд нь зүүх зайлшгүй шаардлагатай аж. Иргэн та вакцин хийлгэсэн байсан ч халдвар хамгааллын дэглэмээ баримтал. Вакцин нь халдвараас 100 хувь хамгаалахгүй учир вакцин хийлгэсэн гээд тайвширч болохгүй. Энэ сарын 14-ний байдлаар Монгол Улсад вакцин хийлгэсэн 2304 хүн халдвар авч, гурван хүн нас барсан тохиолдол бүртгэгдээд байгаа талаар ХӨСҮТ-ийн захирал Л.Баттөр мэдээлсэн. Олон улсад ч мөн иргэд болон эмч, эмнэлгийн ажилчид вакцинд хамрагдсаныхаа дараа халдвар авсан тохиолдол олноор гарсан!

УЛС ОРНУУДАД ХӨЛ ХОРИОНЫ АРГА ХЭМЖЭЭГ ХЭРХЭН АВЧ БАЙГАА ВЭ?
 

Дэлхийн улс орнуудад хөл хорионы арга хэмжээнд ухамсартай хандаж чадахгүй байгаа иргэддээ албадлагын шинжтэй арга хэмжээ буюу торгууль шийтгэл ноогдуулах замаар асуудлыг зохицуулж байна.

Итали

• Италид жилийн өмнө халдварын нөхцөл байдал маш хүндэрч, эмнэлгүүд, нэмэлтээр дэлгэсэн ор дүүрч, цогцос хадгалах газар болон оршуулгын газрууд дүүрсэн билээ. Тухайн үед Италид иргэдийг гэрээсээ гарахыг хатуу хориглож байсан юм. Цогцос хадгалах газрууд дүүрсэн учир цогцос шатааж чандарлах газрыг 24 цагаар ажиллуулж байв. Энэ үеэр Италид эрүүл мэндийн салбар нь ачааллаа дийлэхээ больж, амьсгалын аппарат хүрэлцээгүй болсон тул ахмад настай хүмүүсийг эмчлэхээс татгалзаж, дунд болон залуу үеийнхнийг эмнэлэгт авч байсан гашуун түүх бий.
   

Тус улсад оршуулгын ёслол хийхийг ч хориглож байв. Одоо ч Итали улс халдварын тоогоороо дэлхийд эхний 10 дотор явж байна. Европ тивд халдвар болон нас баралтаараа тэргүүлж буй тус улсад өнгөрсөн оны гуравдугаар сараас хойш хөл хорионы дэглэмийг зөрчсөн хүмүүсийг 400-4000 еврогоор торгож эхэлжээ. Халдвартай хүн тусгаарлалтаас зугтвал таван жилийн хорих ял оноох юм. Хөл хорионы журам зөрчсөн хүмүүсийг баривчилж байгаа нь Итали улсын бусад улсаас ялгагдах онцлог болж байв. Зарим улсад шоронд халдвар голомтлон тархаж, аюулгүй байдлын үүднээс зарим шоронгийн хоригдлуудыг суллаж байсан бол Италид эсрэгээрээ гэртээ байж чадахгүй байгаа хүмүүсийг шууд баривчлан хорьжээ. Тус улсад хөл хориог чангаруулсан үед иргэд эмийн сан, хүнсний дэлгүүр рүү тодорхой цагийн хуваарийн дагуу явдаг. Мөн ковидын халдвартай хэрнээ хамрын мэс засалд орж, эмч, сувилагч нарт халдвар тараасан иргэнд 12 жилийн ял оноосон нь энэ улсын хууль дүрэм хатуу байснаар цар тахалтай тэмцэж чадаж байгааг илтгэнэ. Шинэ жилээр гэрээсээ шалтгаангүй гарсан хүмүүсийг 400-1000 еврогоор торгосон.
 

Канад

• Канадад иргэд хөл хорионы дэглэмийг мөрдөж байгаа эсэхийг эргүүлүүд айлуудаар явж шалгадаг. Ялангуяа гадаадаас ирсэн, 14 хоног өөрийгөө тусгаарлах ёстой хүн байгаа орон сууцнуудыг нэн түрүүнд шалгана. Тус улсад өөрийгөө тусгаарлах нөхцлийг зөрчвөл 750 мянган ам.доллар хүртэлх мөнгөөр торгох, зургаан сар хорих ял оноох журамтай юм.

Герман

• Халдварын тоогоороо дэлхийд тэргүүлж буй 10 улсын нэг болох  байгаа Германд хөл хорионы дэглэм зөрчсөн иргэнийг 10-100 евро, аж ахуйн нэгжийг 5000 еврогоор торгоно. Хүн хоорондын 1.5 метрийн зай баримтлах журмыг зөрчвөл 50-150 евро, олныг хамарсан арга хэмжээ зохион байгуулвал 250-2500 еврогоор торгож байгаа аж.

Испани

• Испанид нохой салхилуулахыг зөвшөөрсөн ч хүүхдээ гадаа гаргахыг хориглосон юм. Мөн энэ улсад байгальд гарах, зуслан руугаа явахыг хориглосон бөгөөд энэ хоригийг зөрчвөл 1500 еврогоор торгоно. Иргэд хүүхдүүдээ салхинд гаргахыг зөвшөөрөх хүсэлтийг тасралтгүй тавьж байгаа ч Испани улсад бага насны хүүхдүүдийг халдвараас хамгаалах хатуу журамтай. Монгол Улсад коронавирусний халдвараар өвчилсөн хүүхдүүдийн тоо 3300 давсан талаар ЭМЯ-наас мэдээлсэн. Мөн нэгэн сэтгэл сэртхийлгэм тоог өнөөдөр зарласан нь сүүлийн 7 хоногт 22 хүн ковидын улмаас нас барсан гэдэг мэдээ байлаа.

Их Британи

• Вакцин хийж эхлээгүй байх үед сүргийн дархлаа тогтоохыг илүүд үзэж байсан Их Британид олон нийтийг бүхэлд нь хянахад цагдаагийн хүч хүрэлцэхгүй байгаа аж. Гэхдээ өндөр хэмжээний торгууль иргэддээ ноогдуулаагүй. Тус улсад одоо вакцинжуулах ажлыг эрчимжүүлэхийн зэрэгцээ иргэдийн ухамсар ч дээшилжээ. Хөл хорионы дэглэм ямар ч дарга, сайд, хатан хааны гэр бүлд ижил тэнцүү үйлчилнэ. Их Британийн хатан хаан II Элизабетын нөхөр, Эдинбургийн гүн Филиппийг оршуулах ёслол өчигдөр /2021.04.17/ зөвхөн хатан хааны гэр бүлийн гишүүдийн хүрээнд болсон билээ. Оршуулгын ёслолд оролцсон бүх хүн амны хаалттай байсан юм. Хатан хааныхаа гэр бүлийн баяр ёслол, оршуулгад идэвхтэй оролцдог ард түмэнтэй энэ улсын хатан хаан Элизабет цар тахлын нөхцөл байдлын улмаас хунтайж Филиппийг оршуулах ёслолыг бүх нийтэд нээлттэйгээр хийхгүй болсонд ард түмнээсээ уучлалт хүссэн юм.

Франц

• Францад гэрээсээ гарсан шалтгаанаа хуулийн үндэслэлтэйгээр тайлбарлаж чадахгүй бол 135 еврогоор торгуулна. Давтан зөрчил гаргавал 3700 еврогоор торгоно.

Швейцар

• Швейцарт иргэдийн салхилдаг гудамж, талбайд зугаалахыг хориглосон сануулга хаа сайгүй наажээ. Энэ хоригийг зөрчвөл 135 еврогоор торгуулж, давтан зөрчил гаргавал 1500 евро буюу монгол мөнгөөр 4.3 сая төгрөгтэй тэнцэхүйц мөнгөн торгууль ноогдуулна.

АНЭУ

• Хамгийн хатуу шийтгэлийг Арабын Нэгдсэн Эмирт Улс авч байна. Энэ улсад 14 хоногийн зайлшгүй хөл хориог зөрчсөн этгээдийг таван жил хорих ял, 13 мянгаас 27 мянган ам.доллар (34 сая төгрөг-70.7 сая төгрөг)-ын торгууль ноогдуулахаар болжээ.

Австрали

• Австралид мөн их хэмжээний торгууль ноогдуулж байгаа бөгөөд мужууд өөр өөрсдийн журмын дагуу 7730-30000 ам.долларын торгууль ноогдуулж байна.

БНСУ

Өмнөд Солонгост иргэдэд дэг журмыг сахиулахын тулд технологийн дэвшлийг ашиглаж байна. Өөрийгөө тусгаарлах ёстой хүн бүрийг байршил тогтоох тусгай аппликейшн татаж авахыг үүрэгдэж иргэн бүр халдварын талаар мэдээлэх апп ашиглаж буй. Хөл хорионы үеийн зөрчил гаргасан иргэнийг 10 сая воноор торгох эсвэл жилийн хугацаанд шоронд хорих ялаар шийтгэнэ.

ОХУ

• Хойд хөршийн Төрийн Дум Эрүүгийн хуулиндаа өөрчлөлт оруулж, хөл хорионы дэглэм зөрчиж, бусдад халдвар тараасан хүмүүсийг 500 мянгаас нэг сая рубль буюу монгол мөнгөөр 16.6-33.2 сая төгрөгөөр торгож байна. Хойд хөрш нь коронавирусний халдварын тоогоороо дэлхийд тавдугаарт бичигдсэн хэвээр байгаа юм.

МОНГОЛ УЛСАД КОВИДТОЙ ТЭМЦЭХ ХҮНИЙ НӨӨЦГҮЙ БОЛОХ ЭРСДЭЛ НҮҮРЛЭЭД БАЙНА
 

ЭМЯ-ны Судалгаа, төлөвлөлтийн хэлтсийн дарга Б.Бумдэлгэрийн мэдээлснээр манай улсад эмнэлгийн ачаалал сүүлийн өдрүүдэд эрс нэмэгдэж байна.

Хүндэвтэр, хүнд болон нэн хүнд хүний тоо нэг сарын өмнөхтэй харьцуулахад 28-30 дахин нэмэгджээ. Энэ нь эмнэлгийн ачааллыг 10-аас дээш хувиар нэмэгдүүлж, эмнэлгүүдэд ор дэлгэх ажлыг ажлыг үе шаттай зохион байгуулж байгаа ч хүний нөөцийн хувьд хүнд байдал үүсэж эхэлжээ. Амьсгалын аппарат улсын хэмжээнд хангалттай байгаа ч түүнийг ажиллуулдаг хүний нөөцийн хомсдолд орсон байна. Эмнэлгүүдэд эрчимт эмчилгээний орны тооноос 2-3 дахин олон амьсгалын аппарат бэлтгэсэн байгаа аж.

Монгол Улсын хэмжээнд уушги орлуулах гурван эсмо аппараттай болж нэмэгдсэн. Өмнө нь уушги орлуулагч энэхүү аппарат Улсын нэгдүгээр эмнэлэг дээр нэг байсан. Сүүлд нэг ирснийг Цэргийн төв эмнэлэгт суурилуулж байна. Энэ сарын сүүлээр ирэх аппаратыг Улсын гуравдугаар төв эмнэлэгт суурилуулна. Одоогоор эрчимт эмчилгээнд орсон хүмүүс тоног төхөөрөмж дутагдах, хүний нөөц хомсдох зэргээс үүдэн эмнэлгийн тусламж авч чадахгүй хүнд нөхцөл байдалд хараахан очоогүй байгаа ч энэ хэвээр үргэлжилбэл аппаратаа ажиллуулах эрчимт эмчилгээний эмчийн дутагдалтай, хүний нөөцгүй болох хүнд үе ойрхон байна. 

Холбоотой мэдээ
 

КОВИДЫН ХҮНД НӨХЦӨЛИЙН улмаас НАС БАРАХ тохиолдол нэмэгдлээ

ЭНЭ 7 ХОНОГТ I 6966 хүн халдвар авч, ХАМГИЙН ӨНДӨР түвшинд хүрлээ