Гэмт хэргийн гаралт ихэсдэг нь Хэллоуинтэй холбоотой юу?

Энэ жилийн шилдэг Хэллоуин хувцас

Google-ээс жил бүр тренд болж буй Хэллоуины шилдэг 25 хувцасны жагсаалтыг гаргадаг билээ. Үүнийг есдүгээр сарын хайлтын системийн мэдээлэл дээр үндэслэн гаргадаг байна.

Энэ жилийн жагсаалтын тэргүүнд саяхан нээлтээ хийсэн "Бийтлжүүс" киноны агшсан толгойт сүнс Бобын дүр орж, олимпын үеэр Австралийн багийг төлөөлөн тэмцээнд оролцсон брейк бүжигчин Рэйгун хоёрдугаар байрт оржээ,. Гуравдугаар байрт алдарт "Poppy Playtime" видео тоглоомын муур мангас CatNap тус тус орсон байна.

Түүнчлэн шилдэг 25-д Pixar-ийн "Inside Out" киноны гол таван дүр болох атаархал, уур хилэн, зэвүүцэл, түгшүүр, баяр баясгалан гэсэн хүний ​​дүр төрхөөр дүрслэгдсэн сэтгэл хөдлөлүүд багтжээ.

Шилдэг 25 хувцасны жагсаалтад:

1. “Бийтлжүүс” Агшсан толгойт Боб,
2. Брейк бүжигчин Рэйгун
3. Кетнап
4. “Бийтлжүүс”  Делорис
5. “Гайхамшигт дижитал цирк” Помни  
6. “Inside Out” Атаархал,
7. “Үр удам” Улаан
8.  Доктор Дүүм
9. Сабрина Карпентер
10. Хатагтай Deadpool
11. Чипотле буррито
12. “Inside Out” Уур хилэн
13. “Inside Out” Зэвүүцэл ,
14. Волверин
15. “Inside Out” Түгшүүр,
16. “Бийтлжүүс”  Делиа Диз
17. Гамбит
18. Dune
19. Минион
20. “Соник зараа” Shadow
21. “Inside Out” Баяр баясал,
22.  “Fortnite” Пийли
23. “Бийтлжүүс” Лидия Диз
24. Soulja Boy
25. Гозилла тус тус оржээ 

Нэгэн гэр бүл байшиндаа Хэллоуины чимэглэл хийхийн тулд 1000 фунт зарцуулжээ

Их Британид Хэллоуины баярт  маш дуртай аав хүү хоёр Чеширийн байшингаа Хэллоуины баярт зориулан өөрчлөхөд 1000 фунт зарцуулж гэнэ.

27 настай Тоби Уиттл болон түүний аав 55 настай Энди нар 2017 оноос хойш жил бүр Маклсфилд дахь Уэстон эдлэнд байрлах байшиндаа засвар хийж, аймшгийн байшин мэт үзэмжтэй болгодог заншилтай ажээ.

Аравдугаар сарын 31-нд тэдний гайхалтай чимэглэлийг харахаар 48 км зайг туулан ирэх олон зуун хүнд зориулж чимэглэлд 1000 фунтийг, амттанд 75 фунтийг зарцуулсан гэв.

Тоби хэлэхдээ "Энэ бүгд аавын минь санаа байсан, тэр хөршүүдийнхээ хүүхдүүдэд зориулж ямар нэг юм хиймээр байна гэхэд л бид дизайнаа бодож эхэлсэн. Одоо харин бид Их Британийн хамгийн аймшигт байшингуудын нэгийг хийсэн гэж бодож байна" гэжээ.

Хэдхэн гоёл чимэглэлээр эхэлсэн зүйл маань жилээс жилд нэмэгдсээр л байна.

Сүнстэй цэцэрлэгт араг яснуудыг сандал дээр суулган байрлуулж, зам дээгүүр яс тараан, хажууд нь хулуунууд  гэрэлтэж харагдана.

1.5м урттай аалз, архирч буй чоно, хашхирч буй шуламнуудыг дүрсэлсэн барималтай аж.

Өнгөрсөн Хэллоуины баяраар 500 орчим хүн байшинг нь үзэхээр ирсэн, харин энэ жил илүү олон хүн ирнэ гэж тооцоолж байна гэжээ.

Яагаад зарим улс Хэллоуиныг тэмдэглэхийг хориглодог бэ?

Саудын Араб

Саудын Арабт хэн ч тоодоггүй, тэмдэглэхийг ч хориглосон баяр. Засгийн газраас Исламын хуулийн дагуу хориотой гэж үздэг. Хэрэв тус баярыг тэмдэглэж байгаад баригдвал торгуулаад зогсохгүй шоронд хорих шийтгэл ч оноох магадлалтай байдаг гэнэ.

Иран

Иранд Хэллоуиныг Исламын сургаалтай зөрчилддөг, барууны соёлын довтолгоо гэж үздэг. Засгийн газраас Хэллоуиныг тэмдэглэхгүй байхыг анхааруулж, сургуулиудад холбогдох аливаа арга хэмжээ зохион байгуулахыг хориглосон байдаг аж.

Малайз

Малайзад Хэллоуиныг тэмдэглэхийг ихэнх нь дургүйцдэг, ялангуяа исламын шашинтнууд үүнийг муу ёр гэж үзэх нь их. Засгийн газраас шашны итгэл үнэмшилтэй нийцэхгүй, ямар нэг сөрөг үр дагаварт хүргэж болзошгүй гэж үздэг тул хоригложээ.

Энэтхэг

Энэтхэгт Хэллоуиныг албан ёсоор хориглоогүй ч өргөн дэлгэр тэмдэглэдэггүй. Тус улс өөрийн гэсэн олон баяр наадамтай бөгөөд Хэллоуинтай итгэл үнэмшлийн хувьд зөрчилддөг гэж үздэг аж.

Коста-Рика

Коста-Рикагийн аравдугаар сарын 31-ний өдөр бол Маскарадын үндэсний өдөр юм. Энэ нь Хэллоуины баяр зэрэг гадаадын баярыг тэмдэглэхээс илүү өөрсдийн баяраа тэмдэглэн, ёс уламжлалаа хадгалж буй нэг хэлбэр юм.

Хэллоуины баяраар гэмт хэргийн гаралт ихэсдэг

Хэллоуины баярын өдрүүдээр хулгай, дээрэм, төрийн болон хувийн өмчид халдах гэх мэт гэмт хэргийн гаралт харьцангуй ихэсдэг талтай. Тус баярын өдрөөр гарсан аймшигт гэмт хэргээс цөөн хэдийг хүргэе.

Кэтрин Армстронг

1963 оны Хэллоуины үдэш Английн Ньюкаслд аймшигт аллага болж байсан удаатай. Тэтгэвэрт гараад удаагүй сургуулийн захирал Лилиан Армстронг гэртээ 28 удаа хутгалуулж, оймсоор боомилуулсан байдалтай олджээ. Хэргийн газраар дүүрэн цус урссан байсан нь ухаан мэдрэлгүй дайрсан гэдгийг илтгэнэ. Энэ аллага тус хотын Тайнесайд дүүрэгт урьд өмнө болж байгаагүй хамгийн аймшигтай аллага болон үлдсэн юм.

Цагдаа нар энэ хэргийн тодорхой шалтгааныг яаж ч хичээсэн тодорхойлж чадахгүй байлаа. Хүчээр гэр рүү нь орсон, бэлгийн хүчирхийлэл үйлдсэн, ямар ч хулгай, дээрэм хийсэн ул мөргүй. Алуурчны аллага хийхдээ ашигласан зэвсэг ч олдоогүй бөгөөд мөрдлөгийн явцад 16,000 гаруй хүнтэй ярилцлага хийсэн ч үр дүнд хүрээгүй. Лилианыг алсан нэгэн түүний таньдаг хүн байсан уу? Өмнө нь халдлага үйлдэж байсан хүн энэ аймшигт хэргийг хийв үү?

Асуултууд овоорсон ч хариулт нь хомс байв.

Хэдэн жилийн дараа аймшигт хэрэг болсон байшинг өөр хүмүүс түрээслэв. Шинэ  эзэмшигчид нь хий зүйл хардаг, хэвийн бус зүйл үргэлж болдог гэх яриа тарааснаас тус байшинг хий үзэгдэлтэй гэх яриа гарах болжээ. Энэ нь цаг бусаар нас барсан Лилианы сүнс байж болох уу?

Энэ хэрэг өнөөдрийг хүртэл шийдэгдээгүй хэвээр байгаа нь гэмт хэргийн түүхэнд аймшигт толбо болон үлджээ.

Терресса Ванегас

2006 оны аравдугаар сарын 31, Терресса Ванегас болон түүний гэр бүлийн хувьд хар дарсан зүүд мэт шөнө. 16 настай охиныг хамгийн сүүлд 23:00 цагийн үед Грийн Кэй (Хойд Дакота, Дикинсон) хэсгийн ойролцоо хичээлээ тараад гэр рүүгээ алхаж байхад нь харжээ.

Террессагийн цогцос Дикинсоны ахлах сургуулийн эсрэг талын талбайгаас гурав хоногийн дараа олдоход түүний бүх үсийг хайчилж, хүчирхийлж, боомилж алсан байдалтай олсон байна. Хэллоуины баярын тэрхүү аймшигт үдшээс хойш 17 гаруй жил өнгөрсөн ч хэрэг шийдэгдээгүй хэвээр байна.

Мөрдөгчид 45 хүнтэй ярилцлага хийсэн ч тодорхой нотлох баримт байхгүйгээс сэжигтнийг олох боломжгүй болж, энэ хэрэг одоо болтол хаагдаагүй хэвээр байгаа бөгөөд Террессагийн гэр бүлийнхэн хэргийг хааж, алуурчныг шүүхэд өгөх өдөр ирнэ гэж найдаж байгаа аж.

Японы Хэллоуинд зориулсан зомбитой галт тэрэг

Японы алдарт хурдан галт тэрэгний аяллын үеэрх зорчигчдод зомбигийн халдвар дэгдсэн мэт бодогдуулж айдаст автуулах ажиллагааг зохион байгуулжээ.

Шинкансен галт тэргээр Токиогоос Осака хот хүрэх хоёр цаг хагасын аялалд 40 орчим амьд үхдэлийн дүрд хувирсан хүмүүсийг хамт зорчуулсан байна.

Энэ санааг 2016 онд нээлтээ хийж, хит болоод байсан “Бусан хүрэх галт тэрэг” киноноос сэдэвлэсэн гэнэ.

Гадаадын жуулчдын нэг, 31 настай, Америк эр Жошуа Пэйн байв. Тэрбээр "Яг кинонд орчихсон юм шиг санагдаж, урдаа болж байгаа үйл явдлыг харахаас өөрийг хийж чадаагүй. Ийм зүйлийг өөрийн биеэр мэдэрсэн нь үнэхээр гайхалтай бас шинэлэг зүйл байлаа“ гэжээ.

“JR” компанийн аялал жуулчлалын салбарын захирал Мари Изуми хэлэхдээ, “Ковагарасе хамтлаг өөрсдийн амьд үхдэлийн талаарх санаагаа танилцуулахад үнэхээр их гайхширсан. Эхэндээ тоглоомон хөрөө, буу зэргийг ашиглах гэж байсан боловч Шинкансений нэр хүндийг унагааж болохуйц хүчирхийллийг дүрслэхээс зайлсхийсэн” гэжээ.

Х.Энхболд