Юн Сог Ёлийг баривчлах үеэр цус асгаруулахгүй байхыг уриалав

БНСУ-ын Ерөнхийлөгч Юн Сог Ёлийн хамгаалалтын албаны дарга Пак Чон Жун, Юн Сог Ёлийг баривчлах ээлжит оролдлогын үеэр цус асгаруулахгүй байхыг уриалжээ.

Ёнхап агентлагийн бичсэнээр, “Ард иргэд төрийн байгууллагууд хооронд мөргөлдөөн болох вий гэж сэтгэл зовниж байна. Ямар ч нөхцөлд мөргөлдөөн гарч, цус асгарах ёсгүй” гэж Пак Чон Жун мэдүүлэг өгөхөөр цагдаагийн газарт очих замдаа сэтгүүлчдэд ярьжээ. Түүнийг төрийн байгууллагад үүрэг гүйцэтгэхэд нь саад учруулсанд буруутган, хэрэг үүсгээд байна. Тэрбээр “Мөрдөн шалгах процедур өнөөгийн ерөнхийлөгчийн статуст нийцэх ёстой. Харин ерөнхийлөгчийг баривчлах одоогийн хувилбар үүнд нийцэхгүй байна гэж үзэж байна” гэжээ.

Энэ сарын 3-нд Юн Сог Ёлыг баривчлах оролдлогын үеэр тэрбээр ерөнхийлөгчийн ордны нутаг дэвсгэрт нэгжлэг явуулахыг хориглосон. Энэ үйлдэл нь хууль зөрчинө хэмээн тэрбээр тайлбарласан. Тав гаруй цаг сөргөлдсөний эцэст мөрдөгчид ерөнхийлөгчийн ордныг орхисон юм.