Үханьд тэмцээнд оролцсон “Дэрэн” клубын хүүхдүүдийн хариу үгүйсгэгджээ

БНХАУ-ын Үхань хотод энэ сарын 15-20-ны хооронд зохион байгуулагдсан хүүхдийн хөлбөмбөгийн тэмцээнд Монгол Улсаас “Дэрэн” клубын тамирчид оролцсон билээ. 

“Дэрэн” клубынхэн коронавирусийн голомт болох Үхань хотод тэмцээнд оролцсон тул ХӨСҮТ-өөс тамирчин хүүхдүүдийг шинжилгээнд хамруулжээ. 

Энэ талаар өнөөдөр /2020.01.29/ ЭМЯ-ны Төрийн захиргаа удирдлагын газрын дарга Б.Цогтбаатар мэдээлэл хийхдээ “Нэгдүгээр сарын 9-29-ний хооронд нийт 36 хүнд тархвар судлалын шинжилгээ, онош судлалын шинжилгээ хийсэн. Өнөөдрийн байдлаар ХӨСҮТ-д 16 хүнийг тусгаарлаад байна. БНХАУ-аас улсын хилээр орж ирсэн, халуурсан өгүүлэмжтэй 29 зорчигчийг ХӨСҮТ-д тусгаарлаж, шинжилгээ хийснээс 14 хүний шинжилгээ өнөөдрийн байдлаар үгүйсгэгдээд байна. Тухайлбал, Хонконгоос ирсэн зорчигчид, Бээжингээс ирсэн зорчигч болон “Дэрэн” хөлбөмбөгийн клубын хүүхдүүд багтаж байна. Одоо шинжилгээ үргэлжилж байгаа 18 хүн бий. ХӨСҮТ-д 16 хүн, Дорнод аймгийн Бүсийн оношилгоо, эмчилгээний төвд хоёр хүнийг тусгаарласан” гэлээ.