ЭМЯ | Халдвар нэмж илрээгүй, гурван хүн эдгэрлээ

Эрүүл мэндийн яамнаас коронавируст цар тахлын нөхцөл байдлын ээлжит мэдээллийн үеэр халдвар нэмж илрээгүй, харин гурван хүн эдгэрсэн тухай мэдээллээ.

Эдгэсэн гурван хүн нь 22-31 насны энхийг сахиулагчид байжээ.

Өчигдөр ХӨСҮТ-ийн вирус судлалын лаборатори, Дархан хотын салбар лабораторид нийт 750 хүнд шинжилгээ хийхэд коронавирус илрээгүй аж.

“Тухайлбал долоодугаар сарын 29-нд Сөүл-Улаанбаатар чиглэлээр ирсэн 156, долоодугаар сарын 30-нд Сидней-Улаанбаатар чиглэлээр ирсэн 78, наймдугаар сарын 09-нд Франкфурт-Улаанбаатар чиглэлээр ирсэн 253 хүний давтан шинжилгээнд коронавирус илрээгүй. Түүнчлэн Орхон аймагт тусгаарлагдсан 77, Дархан хотод тусгаарлагдсан 58, Алтанбулгийн боомтоор ирсэн 22 жолооч мөн коронавирус илрээгүй” гэж ХӨСҮТ-ийн Тандалт, судалгааны албаны дарга А.Амбасэлмаа ярилаа.

Одоогийн байдлаар Монгол Улсад коронавирусний батлагдсан 298 тохиолдол байгаагаас 281 нь эдгэжээ. Харин ХӨСҮТ-д 17 хүн эмчлэгдэж буй бөгөөд хоёр иргэний биеийн байдал хүндэвтэр байна.

Тусгаарлан ажиглах байранд байсан жирэмсэн эх наймдугаар сарын 19-ний 02:00 цагт амаржиж, 2800 гр охинтой болжээ.