ӨГЛӨӨНИЙ МЭНД!

Өнөөдөр 2025.04.01. Энэ оны 91 дахь өдөр бөгөөд он дуусахад 274 хоног үлдэж байна. Монгол эх оронд маань нар 06 цаг 30 минутад мандаж, 19 цаг 22 минутад жаргана.

Улаанбаатарт цэлмэг. Өдөртөө 6 хэм дулаан, шөнөдөө 3 хэм хүйтэн байна. Та хувцсаа тохируулж өмсөөд гараарай.

Өнөөдөр Олон улсын инээдмийн баярын өдөр, Олон улсын шувуу хамгаалах өдөр тохиож байна. Японд энэ өдөр Хаврын бүжгийн өдөр бол Тайландад Төрийн албаны, ӨАБНУ-д Гэр бүлийн өдрийг тэмдэглэж байна.

Өнөөдөр “Авьяаслаг Британичууд” нэвтрүүлгийн ялагч, дуучин Сюзан Бойл, Финландын 43 дахь Ерөнхий сайд Александер Стабб, Америкийн сагсан бөмбөгч Робин Лопез, Брүүк Лопез, Олимпын алт, мөнгө, хүрэл медальт, дэлхийн дөрвөн удаагийн аварга Нидерландын гүйлтийн тэшүүрч Ян Блокхуйзен, Олимпын хошой аварга, дэлхийн аварга Хятадын гимнастикч Денг Линлин зэрэг алдартан мэндэлжээ.

Энэ өдөр Монгол Улсын түүхэнд болсон онцлох үйл явдал:

2012 оны энэ өдөр Монгол Улсын дөрөв дэх Ерөнхийлөгч Ц.Элбэгдоржийн ХБНГУ-д хийсэн айлчлал дуусжээ.

Энэ өдөр дэлхийн түүхэнд болсон онцлох үйл явдлууд:

1939 оны энэ өдөр Испанид Бүгд найрамдах засаглалын цэргүүд бууж өгснийг удирдагч Франциско Франко зарлажээ. Ингэснээр Испанийн иргэний дайн эцэслэв.

1970 оны энэ өдөр АНУ-ын Ерөнхийлөгч Ричард Никсон Тамхины олон нийтийн хяналтын тухай хуульд гарын үсэг зурснаар телевиз, радиогоор тамхины үйлдвэрлэлийг сурталчлах, реклам явуулах зэргийг хоригложээ.

1976 оны энэ өдөр Америкийн иргэн Стив Жобс, Стив Возниак, Рональ Вэйн нар АНУ-ын Калифорниа мужийн Купертино хотод “Apple” компанийг байгуулжээ.

2001 оны энэ өдөр Нидерландад ижил хүйстний гэрлэлтийг хуульчилсан байна.

2004 оны энэ өдөр технологийн алдарт “Google” компани цахим шуудангийн үйлчилгээ үзүүлэх “Gmail” программыг олон нийтэд танилцуулав.

2009 онд Албани болон Хорват улс НАТО-д элсэв.

2016 онд “Дөрвөн өдрийн дайн” гэж нэрлэгдсэн Уулын Карабахад зэвсэгт мөргөлдөөн эхэлжээ.

Билгийн тооллын 3. Тухайн өдөр луу жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр худалдаа арилжаа хийх, бизнэс эхлэх, хүү сангийн эх хатгах, эд агуурс авах, зээл авах, арвижуулах, дэлгэрүүлэх үйлийг эхлэх, лусыг тахих, хүүхэд үрчлэн авах, урлан бүтээхэд сайн. Улааны үйл, төлөг тавих, морь уралдах, сэтгэлд сэвтэй газар очиход муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод зүүн урагш мөрөө гаргавал зохистой. Дашням өдөр.

Өнөөдөр үс засуулбал эд мал баялаг төгөлдөр болно.

Өнөөдрийн ажилд тань амжилт хүсье!