Обама: Палестинчуудын эсрэг харгислалынхаа төлөө Израил хариуг нь амсана

АНУ-ын Ерөнхийлөгч асан Барак Обама Газын зурвасыг бүрэн бүсэлснээр Израил дэлхий дахинд дэмжлэгээ алдаж, улмаар энэ нь дайснуудад нь ашигтайгаар эргэх талтай гэж мэдэгджээ.

Израил Газын зурвасыг бүрэн бүсэлж, хоёр сай гаруй иргэдийг нь ус, цахилгаан, эм, хүнсгүй болгосноор палестинчуудын еврейчүүдийг олон үеэр үзэн ядах сэтгэлийг улам дэвэргэхээс гадна дэлхий дахины дэмжлэгийг алдахад хүргэж болзошгүй. Ингэснээр Израилын дайснуудад ашигтайгаар эргэж, бүс нутагт энх тайван, тогтвортой байдлыг тогтооход чиглэсэн олон жилийн хүчин чармайлтыг үгүй хийнэ гэж Обама онцолсон байна.

Газын зурвасыг бөмбөгдөх үеэр олон мянган палестин хүн амиа алдсанаас ихэнх нь хүүхдүүд. Олон мянган хүн орон гэрээ орхихоос өөр аргагүйд хүрээд байна. Газын зурвасын ард иргэдийн хүнс, ус, цахилгааныг таслах Израилын Засгийн газрын шийдвэр хүмүүнлэгийн хямралыг гүнзгийрүүлэхээс гадна палестинчуудын олон үеэрээ еврейчүүдэд хандах хандлагыг хилэгнүүлнэ. Хэдийгээр АНУ Израилыг дэмжиж байгаа ч Израил Хамас бүлэглэлийн эсрэг ямар арга хэрэглэж буйг үл ойшоож болохгүй. Израилын цэргийн стратеги олон улсын эрх зүй, тэр дундаа энгийн иргэдийг хамгаалахыг шаардсан хууль дүрмийг баримтлах ёстой гэж Обама онцлон тэмдэглэсэн байна. Обама еврейчүүдийн эсрэг үзэлтэй тэмцэхийн сацуу палестинчуудын зовлон, шаналлыг ч үл ойшоохгүй байхыг уриалжээ.