Иран, Аргентин БРИКС-т элсэх өргөдөл өгөв

Иран, Аргентин БРИКС-т нэгдэх өргөдөл өгсөн тухай Ираны “Тасним” мэдээллийн агентлаг мэдээлжээ.

Аргентины Ерөнхийлөгч Алберто Фернандес гурван хоногийн өмнө БРИКС-ийн дээд хэмжээний уулзалтын үеэр тус улс БРИКС-т нэгдэх хүсэлтэй буй тухай мэдэгдсэн бол даваа гарагт Ираны Гадаад хэргийн яамны төлөөлөгч Саид Хатибзаде Иран БРИКС-т элсэх эрмэлзэж байгааг дуулгажээ.

БРИКС-т Бразил, Орос, Энэтхэг, Хятад, Өмнөд Африк зэрэг таван улс багтдаг. БРИКС нь эдгээр таван улсын нэрийн эхний үсгийн нийлбэр юм. БРИКС-ийн эгнээг тэлэх санаачилгыг анх БНХАУ гаргаж байв.

Иран, Аргентинаас гадна хэд хэдэн улс БРИКС-т нэгдэх хүсэлтэйгээ илэрхийлээд байна. ОХУ-ын Шинжлэх ухааны академийн шинжээчийн хэлснээр, БРИКС нь өргөжих түүхэн мөчид тулж ирээд байна. Өнөөгийн нөхцөл байдалд энэ нь зүйтэй алхам гэж шинжээч онцолжээ. БРИКС-ийн дээд хэмжээний уулзалт өргөтгөсөн “БРИКС+” форматаар өрнөж, үүнд хэд хэдэн улс нэгдээд байна. Ойрын ирээдүйд эл нэгдэл Латин Америк, Ойрх Дорнод, Зүүн өмнөд Азийн улс орнуудаар эгнээгээ тэлэх боломжтой гэж үзэж байна. Ингэснээр, өрнөд ард түмнүүдийн дунд хана барьж, хориг арга хэмжээгээрээ эдийн засгийн хөгжлийг нь боомилж байгаа бол БРИКС нь ард түмний хооронд гүүр барьж, ойртуулна гэсэн мессеж өгөх юм. Бээжинд энэ сарын 23-24-нд болсон дээд хэмжээний уулзалтаар үүнийг баталсан олон баримт, тоо дурдагдсан. Өнгөрсөн онд гэхэд БРИКС-ийн орнууд дэлхийн эдийн засгийн өсөлтийн 50 хувийг хангажээ. БРИКС-ийн таван орны худалдааны нийт эргэлт 8.55 их наяд ам.долларт хүрсэн нь дэлхийн хөгжлийн голомт нь хаана буйг харуулж байна гэж шинжээч дүгнэжээ.